كلما حطّيت راسي عاالمخدّه
قامت الافكار في راسي تدور
.
ابني الهوجاس في بالي واهدّه
واعبر النهرين والسبع البحور
.
واخذ الكوكب من العالي واردّه
وابعث اللي تحت طيّات القبور
.
فاق ليلي وانتبه من جدّ جِدّه
وغار نومي باالنجوم اللي تغور
.
لين مكنون العنى بيّحت سدّه
وعيوني شاخصه والدم يفور
.
وانطلق فكري يهيم وحام حدّه
وبنى لي من هواجيسي قصور
.
نامو العالم وانا احطّه واشدّه
لين نجم الصبح يأذن باالضهور
.
وطيور الفجر ماالشّباك تنّده
ماوعيت الا ويملا الغرفه نور
.
هذه افكاري عنيده مستبدّه
ما تريحّني وبحوالي تجور
.
والهواجس في نحور الليل غُدّه
غاشمه تهجم علينا بلا شعور

على الحبيب القلب هايم وحيران
مستقبله والذكريات القديمه
.
اللي جماله غير والحسن فتّان
حسنه خطر دايم وزينه جريمه
.
واللي على عرش المحبين سلطان
فريد في وصفه صفاته عديمه
.
واللي لبحر الشوق مرسى و رُيّان
مدّه وجزره والفنار ونسيمه
.
واللي لورد الشوق غيمه وهتّان
تروي حكايه بين وادي وديمه
.
ما يشبهه في زينه انسً ولا جان
جنبه تشين اهل الوجوه الوسيمه
.
كِنّه ملك مخلوق في هيئة انسان
فوق الضنون وكل اموره سليمه
.
الله يعيذه من هوى كل شيطان
ويزيّنه من كل خصله كريمه
.
عزالله انّي اشتاق له كل الاحيان
شوق النديم اللي مهاجر نديمه
.
من لامني يبلاه ربّي باالاحزان
ويعلّ روحه طول عمره سقيمه
.
كيف العمل والحل يااطوال الايمان
ما للهوى في قتل الارواح شيمه
.
ذاب الربيع اللي حضن خضر الاغصان
للي بنى في واحة القلب خيمه
.
وتغرّبت في نضرتي كل الاوطان
ولا بقى لي غير نضره يتيمه
.
ارسل له اشواقي مع طير الاشجان
والا مع ضبي البراري وريمه
.
للغالي اللي ما يثمّن بالاثمان
كل الوصوف اللي كسبها عضيمه
.
جنّة عدن وانعيمها اشكال والوان
يالبّ عمرً عايمً في نعيمه